ਇਹ ਅੰਤਰਿੰਗ ਕਮੇਟੀ ਨਹੀਂ ਸੀ, ਸਗੋਂ ਕੌਰਵਾਂ ਦੀ ਸਭਾ ਸੀ, ਧਾਮੀ ਜੀ ਨੇ ਭੀਸ਼ਮ ਦਾ ਭੂਮਿਕਾ ਨਿਭਾਈ: ਬੀਬੀ ਪਰਮਜੀਤ ਕੌਰ ਲਾਂਡਰਾਂ
ਬੀਬੀ ਕਿਰਨਜੋਤ ਕੌਰ ਨੇ ਬਾਦਲ ਦਲ ਦੀ ਸ਼੍ਰੋਮਣੀ ਕਮੇਟੀ ਦੀ ਨਿੰਦਾ ਕੀਤੀ ਅਤੇ ਕਿਹਾ :- ਉਨ੍ਹਾਂ ਨੇ ਮਾਈਕ ਖੋਹ ਲਿਆ ਅਤੇ ਬਦਤਮੀਜ਼ੀ ਕੀਤੀ
ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਬਜਟ ਇਜਲਾਸ ਅੱਜ ਹੋਇਆ। ਇਜਲਾਸ ਤੋਂ ਬਾਹਰ ਆ ਕੇ ਵਿਰੋਧੀ ਧਿਰ ਦੀ ਮੈਂਬਰ ਬੀਬੀ ਪਰਮਜੀਤ ਕੌਰ ਲਾਂਡਰਾਂ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਇਹ ਅੰਤਰਿੰਗ ਕਮੇਟੀ ਨਹੀਂ ਸੀ, ਸਗੋਂ ਕੌਰਵਾਂ ਦੀ ਸਭਾ ਸੀ। ਉਨ੍ਹਾਂ ਨੇ ਦੱਸਿਆ ਕਿ ਪ੍ਰਧਾਨ ਧਾਮੀ ਜੀ ਨੇ ਭੀਸ਼ਮ ਦਾ ਭੂਮਿਕਾ ਨਿਭਾਈ। ਸਿੱਖ ਕੌਮ ਹਮੇਸ਼ਾ ਬੇਗਾਨੀਆਂ ਔਰਤਾਂ ਦੀ ਪੱਤ ਦੀ ਸੰਭਾਲ ਕਰਦੀ ਰਹੀ ਹੈ, ਪਰ ਅੱਜ ਔਰਤਾਂ ਨੂੰ ਬੋਲਣ ਦਾ ਮੌਕਾ ਨਹੀਂ ਦਿੱਤਾ ਗਿਆ। ਉਨ੍ਹਾਂ ਨੇ ਕਿਹਾ ਕਿ ਮਨੁੱਖੀ ਸੰਗਠਨ ਵਲੋਂ ਪ੍ਰਧਾਨ ਜੀ ਨੂੰ ਭੇਜੀ ਗਈ ਜਾਂਚ ਰਿਪੋਰਟ ਨੇ ਧੱਕੇਸ਼ਾਹੀ ਦਾ ਪਤਾ ਦਿੱਤਾ।
ਬੀਬੀ ਕਿਰਨਜੋਤ ਕੌਰ ਨੇ ਕਿਹਾ ਕਿ ਅੱਜ ਉਹ ਬਹੁਤ ਅਫਸੋਸ ਨਾਲ ਕਹਿ ਰਹੀ ਹੈ ਕਿ ਅੰਤਰਿੰਗ ਕਮੇਟੀ ਨੇ ਜਥੇਦਾਰਾਂ ਲਈ ਜੋ ਫੈਸਲੇ ਕੀਤੇ, ਉਹਨਾਂ ਨੂੰ 40 ਮੈਂਬਰਾਂ ਨੇ ਰੱਦ ਕਰਨ ਲਈ ਲਿਖ ਕੇ ਦਿੱਤਾ ਸੀ। ਉਨ੍ਹਾਂ ਨੇ ਦੱਸਿਆ ਕਿ ਨਿਯਮਾਂ ਅਨੁਸਾਰ ਬਜਟ ‘ਤੇ ਮਤਾ ਹੋਣਾ ਚਾਹੀਦਾ ਸੀ, ਪਰ ਉਨ੍ਹਾਂ ਦੀ ਮੰਗ ਨੂੰ ਏਜੰਡੇ ਵਿੱਚ ਸ਼ਾਮਲ ਨਹੀਂ ਕੀਤਾ ਗਿਆ।
ਬੀਬੀ ਕਿਰਨਜੋਤ ਕੌਰ ਨੇ ਇਹ ਵੀ ਕਿਹਾ ਕਿ ਜਦੋਂ ਉਹ ਬੋਲਣ ਲਈ ਖੜ੍ਹੀ ਹੋਈ, ਤਾਂ ਉਨ੍ਹਾਂ ਨੇ ਮਾਈਕ ਖੋਹ ਲਿਆ ਅਤੇ ਬਦਤਮੀਜ਼ੀ ਕੀਤੀ। ਉਨ੍ਹਾਂ ਨੇ ਬਾਦਲ ਦਲ ਦੀ ਸ਼੍ਰੋਮਣੀ ਕਮੇਟੀ ਦੀ ਨਿੰਦਾ ਕੀਤੀ ਅਤੇ ਕਿਹਾ ਕਿ ਇਹ ਲੋਕ ਪੰਥਕ ਮੁੱਦਿਆਂ ਨੂੰ ਸੁਣਨ ਦੀ ਬਜਾਏ ਮਾਈਕ ਹੀ ਖੋਹ ਲੈਂਦੇ ਹਨ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਉਹ 15 ਮੈਂਬਰਾਂ ਦੇ ਨੋਟਿਸ ‘ਤੇ ਆਪਣਾ ਇਜਲਾਸ ਬੁਲਾਉਣ ਦਾ ਹੱਕ ਰੱਖਦੇ ਹਨ ਅਤੇ ਜਨਰਲ ਇਜਲਾਸ ਬੁਲਾਉਣ ਦੀ ਯੋਜਨਾ ਬਣਾ ਰਹੇ ਹਨ।
ਵਾਕਆਊਟ ਕਰਨ ਵਾਲੇ ਮੈਂਬਰਾਂ, ਜਿਵੇਂ ਕਿ ਬੀਬੀ ਜਗੀਰ ਕੌਰ, ਭਾਈ ਮਨਜੀਤ ਸਿੰਘ, ਸੁਖਦੇਵ ਸਿੰਘ ਭੌਰ, ਬਾਬਾ ਗੁਰਪ੍ਰੀਤ ਸਿੰਘ ਰੰਧਾਵਾ, ਅਤੇ ਬੀਬੀ ਕਿਰਨਜੋਤ ਕੌਰ ਨੇ ਕਿਹਾ ਕਿ ਉਨ੍ਹਾਂ ਦੇ ਮੈਂਬਰਾਂ ਨੂੰ ਬੋਲਣ ਦਾ ਮੌਕਾ ਨਹੀਂ ਦਿੱਤਾ ਗਿਆ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਪਿਛਲੇ ਦਿਨਾਂ ਵਿੱਚ ਕੀਤੀ ਗਈ ਮੰਗ ਪੱਤਰ ਦੇ ਬਾਵਜੂਦ, ਅੱਜ ਦੇ ਇਜਲਾਸ ਵਿੱਚ ਕੋਈ ਏਜੰਡਾ ਨਹੀਂ ਲਿਆ ਗਿਆ। ਉਨ੍ਹਾਂ ਨੇ 15 ਦਿਨਾਂ ਦੇ ਅੰਦਰ ਮੁੜ ਜਨਰਲ ਇਜਲਾਸ ਸੱਦਣ ਦੀ ਮੰਗ ਕਰਨ ਦਾ ਇਰਾਦਾ ਜਤਾਇਆ।
