ਸਰਕਾਰੀ ਸਕੂਨ ਦੀ ਪ੍ਰਿੰਸੀਪਲ ਨੇ ਕਰ ਦਿੱਤਾ ਵੱਡਾ ਘੁਟਾਲਾ, ਮਾਮਲਾ ਦਰਜ ਹੋਣ ਤੇ ਪ੍ਰਿੰਸੀਪਲ ਫਰਾਰ

ਲੁਧਿਆਣਾ ਦੇ ਸੇਖੇਵਾਲ ਪ੍ਰਾਇਮਰੀ ਸਕੂਲ ਦੇ ਮੁੱਖ ਅਧਿਆਪਕ ਖਿਲਾਫ ਮਾਮਲਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਨੇ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ ਦੇ ਬਿਆਨਾਂ ਦੇ ਆਧਾਰ ‘ਤੇ ਕਾਰਵਾਈ ਕੀਤੀ ਹੈ, ਅਤੇ ਇਸ ਸਮੇਂ ਮੁੱਖ ਅਧਿਆਪਕ ਫਰਾਰ ਹੈ। ਪੁਲਿਸ ਉਸਨੂੰ ਗ੍ਰਿਫ਼ਤਾਰ ਕਰਨ ਲਈ ਛਾਪੇ ਮਾਰ ਰਹੀ ਹੈ। ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ ਨੇ ਡਾਬਾ ਪੁਲਿਸ ਸਟੇਸ਼ਨ ਨੂੰ ਜਾਣਕਾਰੀ ਦਿੱਤੀ ਕਿ ਦੋਸ਼ੀ ਨਿਸ਼ਾ ਰਾਣੀ ਬਲਾਕ ਮੰਗਤ-2 ਦੇ ਪਿੰਡ ਸੇਖੇਵਾਲ ਵਿੱਚ ਸਥਿਤ ਪ੍ਰਾਇਮਰੀ ਸਕੂਲ ਵਿੱਚ ਮੁੱਖ ਅਧਿਆਪਕਾ ਹੈ। ਨਿਸ਼ਾ ਨੇ ਆਪਣੇ ਕਾਰਜਕਾਲ ਦੌਰਾਨ 2500 ਤੋਂ ਵੱਧ ਫਰਜ਼ੀ ਦਾਖਲੇ ਕੀਤੇ ਹਨ। ਵਿਭਾਗ ਨੇ ਇਸ ਮਾਮਲੇ ਦੀ ਗਹਿਰਾਈ ਨਾਲ ਜਾਂਚ ਕੀਤੀ, ਜਿਸ ਤੋਂ ਬਾਅਦ ਇਹ ਘੁਟਾਲਾ ਸਾਹਮਣੇ ਆਇਆ। ਨਿਸ਼ਾ ਨੇ ਮਿਡ-ਡੇਅ ਮੀਲ ਗ੍ਰਾਂਟ, ਵਰਦੀ ਗ੍ਰਾਂਟ ਅਤੇ ਵਿਦਿਆਰਥੀ ਸਕਾਲਰਸ਼ਿਪ ਗ੍ਰਾਂਟ ਵਿੱਚ ਧੋਖਾਧੜੀ ਕੀਤੀ ਹੈ ਅਤੇ ਸਕੂਲ ਦੇ ਰਿਕਾਰਡ ਨਾਲ ਵੀ ਛੇੜਛਾੜ ਕੀਤੀ ਹੈ। ਜਾਂਚ ਦੌਰਾਨ ਸਾਰੇ ਤੱਥ ਸੱਚ ਪਾਏ ਜਾਣ ਤੋਂ ਬਾਅਦ, ਡਾਬਾ ਪੁਲਿਸ ਨੇ ਨਿਸ਼ਾ ਖਿਲਾਫ IPC ਦੀ ਧਾਰਾ 409 ਅਤੇ 420 ਦੇ ਤਹਿਤ ਮਾਮਲਾ ਦਰਜ ਕੀਤਾ। ਵਿਭਾਗ ਨਿਸ਼ਾ ਦੇ ਪਿਛਲੇ ਰਿਕਾਰਡ ਦੀ ਵੀ ਜਾਂਚ ਕਰ ਰਿਹਾ ਹੈ ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ ਉਹ ਕਿੰਨੇ ਸਮੇਂ ਤੋਂ ਅਜਿਹੀਆਂ ਗਤੀਵਿਧੀਆਂ ਵਿੱਚ ਸ਼ਾਮਲ ਹੈ।